İnçxon şəhər hökuməti Koreya Qran-Prisinin 2028-ci ildə Formula 1 təqviminə qaytarılmasını nəzərdən keçirir. İlkin təhlil layihənin iqtisadi cəhətdən mümkün olduğunu göstərib.
Məlumata görə, trasın şəhərdəki “Sonqdo Ay İşığı Festivalı Parkı”nda yerləşə biləcəyi qeyd edilir. Təxminən 4,96 km uzunluğuna malik tras 15 döngədən ibarət olacaq və bolidlərin orada 337 km/saat sürətə çatacağı gözlənilir.
Tədbirin gündə 120 000-ə qədər, yarış həftəsonunda isə 300 000-dən çox tamaşaçı cəlb edəcəyi ehtimalı var. Layihə hələlik ilkin mərhələdədir; onun həyata keçirilməsi üçün özəl təşkilatçının iştirakı, eləcə də bir sıra təşkilati məsələlərin həlli tələb olunacaq.
“Yaxın gələcəkdə Koreyada böyük beynəlxalq idman tədbirləri keçirilməyəcək və bir çox vətəndaş Formula 1-ə ev sahibliyi etməyi dəstəkləyir, ona görə də hökumətin etiraz etmək üçün ciddi səbəbi yoxdur. Həmçinin inanırıq ki, özəl təşkilatçı seçməkdə heç bir problem olmayacaq. İnçxonun qlobal şəhərlərin ilk 10-luğuna daxil olmasında Formula 1-ə ev sahibliyi etmək dönüş nöqtəsi olacaq”, – deyə şəhərin meri Yu Çonq bildirib.
