Formula 1 üzrə dünya çempionatında mövsümün 6-cı mərhələsi olan Monako Qran-prisinə start verilib.
Təsnifat yürüşlərində azarkeşlər gərgin mübarizənin şahidi olublar. Son dörd yarışın qalibi olan “Mersedes” pilotu Andrea Kimi Antonelli növbəti dəfə diqqət mərkəzinə düşüb. İtaliyalı sürücü üçüncü seqmentdə 1 dəqiqə 12 saniyəlik nəticə göstərərək poul mövqeyini qazanıb.
“Red Bull”un niderlandlı pilotu, dördqat dünya çempionu Maks Ferstappen ikinci nəticə ilə kifayətlənib. Növbəti iki pillədə “Ferrari” təmsilçiləri qərarlaşıblar. Yeddiqat dünya çempionu Lüis Hemilton üçüncü, monakolu Şarl Lekler isə dördüncü olub.
Ötən mövsüm uğurlu çıxışları ilə seçilən “Maklaren” pilotları isə bu dəfə gözlənilən nəticəni göstərə bilməyiblər. Avstraliyalı Oskar Piastri yeddinci, son dünya çempionu Lando Norris isə səkkizinci yeri tutub.
“Aston Martin”in ispaniyalı sürücüsü, ikiqat dünya çempionu Fernando Alonso isə mövsüm ərzində yaşadığı texniki problemlərin fonunda növbəti uğursuz nəticə ilə yadda qalıb. Alonso təsnifat mərhələsini 21-ci pillədə başa vurub.
