Argentina millisinin kapitanı Lionel Messi dünya çempionatları tarixində eyni turnir ərzində iki penalti zərbəsini qola çevirə bilməyən ilk futbolçu olub.
Futbolinfo.az xəbər verir ki, Messi DÇ-2026-nın 1/8 final mərhələsində Misir millisinə qarşı oyunun 21-ci dəqiqəsində təyin olunan 11 metrlik cərimə zərbəsini dəqiq yerinə yetirə bilməyib.
Onun vuruşunu qapıçı Mustafa Şubir dəf edib.
Bundan əvvəl isə Messi qrup mərhələsinin 2-ci turunda Avstriya millisi ilə keçirilən və Argentinanın 2:0 hesablı qələbəsi ilə başa çatan görüşdə penalti zərbəsini qaçırmışdı.
Beləliklə, Messinin mundiallarda oyun vaxtı yerinə yetirdiyi, lakin qola çevirə bilmədiyi penaltilərin sayı dördə çatıb ki, bu da turnirin tarixində ən pis göstəricidir. Burada yalnız matç zamanı vurulan 11 metrlik cərimə zərbələri nəzərə alınır, penaltilər seriyası isə bu statistikaya daxil edilmir.
Messi həm də dünya çempionatları tarixində ən çox məhsuldar ötürmə edən futbolçular sırasında həmyerlisi Dieqo Maradonanı geridə qoyaraq ilk sıraya yüksəlib. 39 yaşlı forvard dünya çempionatının 1/8 final mərhələsində Misir yığmasına qarşı görüşdə məhsuldar ötürmə müəllifi olub.
Bununla da onun mundiallardakı assistlərinin sayı 9-a yüksəlib. Dünya çempionatlarında məhsuldar ötürmələrin statistikası 1966-cı ildən aparılır.
İyulun 4-də Argentina millisi 1/16 final mərhələsində Kabo-Verde seçməsini əlavə vaxtda 3:2 hesabı ilə məğlub edib. Həmin oyunda əvvəlcə üçüncü qol Kristian Romeronun adına yazılmış, məhsuldar ötürmənin müəllifi kimi isə Messi göstərilmişdi. Lakin sonradan FIFA qolu avtoqol kimi rəsmiləşdirib.