MotoGP-də Qətər qran-prisinin böyük ehtimalla ləğv ediləcəyi və əvəzlənməyəcəyi gözlənilir.
“The Race” paddokdakı mənbələrə istinadən bildirir ki, buna Yaxın Şərqdəki qeyri-sabit geosiyasi vəziyyət səbəb olub.
Lusaildə keçirilməli olan yarış ABŞ və İran arasında münaqişə səbəbindən apreldən noyabra təxirə salınmışdı. Trasdan 40 kilometr məsafədə yerləşən ABŞ-ın Əl-Udeyd aviabazası dəfələrlə raket hücumlarına məruz qalıb. Mənbənin məlumatına görə, regionda gərginlik hələ də yüksək olaraq qalır və təşkilatçılar yaxın günlərdə mərhələnin rəsmi şəkildə ləğv ediləcəyinə hazırlaşırlar.
Daha əvvəl paddokda Qətər qran-prisinin əvəzinə Malayziyanın Sepanq trasında ikiqat mərhələnin keçirilməsi müzakirə olunurdu. Lakin nəşrin məlumatına görə, bu plan təxirə salınıb. Beləliklə, MotoGP çempionatı planlaşdırılan 22 mərhələdən birini itirə bilər.
Qətər mərhələsinin ləğvi çempionatdakı vəziyyətə ciddi təsir göstərəcək. Yarışda ümumilikdə 37 xal uğrunda mübarizə aparılmalı idi. 12 mərhələdən sonra lider Xorxe Martin komanda yoldaşı Marko Bedzekkini 31 xal qabaqlayır.
Münaqişə 2027-ci il üçün MotoGP təqviminin elanına da təsir edib. Seriyanın baş direktorunun müavini Karlos Espeleta bildirib ki, təqvimin açıqlanması iki-üç həftə təxirə salınacaq.