Ölkə futbolu
“Qarabağ”ın “STOP”səbəbləri: Görünən və görünməyən “aysberqlər”
Azərbaycan bu il də Çempionlar Liqasının qrup mərhələsin…
Azərbaycan bu il də Çempionlar Liqasının qrup mərhələsinə düşmək uğrunda keçirilən oyunlarda iştirak etməyəcək. Ardıcıl 2-ci dəfə ölkə çempionu tituluna yiyələnən “Qarabağ” yenə də 3-cü təsnifat mərhələsində ilişdi.
Şotlandiya “Seltik”i indiyədək ÇL-in 3-cü təsnifat mərhələsində Azərbaycan klublarının bəxtinə düşən ən münasib rəqib idi. Ad-sanına görə yox, hazırkı durumuna görə. Ancaq nə qədər acınacaqlı olsa da, “Qarabağ”ın da ötənilki kimi, əzəmətli olmadığını da qabartmalıyıq.
Ağdamlıların oyununda geriləməni yalnız Muarem və Corc, və ya meydançanın faciəvi durumu ilə bağlamaq düzgün deyil. Ötən mövsümə diqqət yetirmək lazımdı. Premyer Liqamızın səviyyəsinin kəskin şəkildə aşağı düşməsi “Qarabağ”dan yan keçə bilməzdi. Yəni, ÇL-in pley-off mərhələsindən dəm vurmaqdan ötrü, ilk öncə çempionatımızın səviyyəsi qalxmalıdı ki, rəqabət ciddi olsun. Başqa sözlə, “tək əldən səs çıxmaz”.
Oyuna gəlincə, “Qarabağ”dan təəccübləndirən yalnız Riçard Almeyda oldu. İndiyədək braziliyalı yarımmüdafiəçinin belə bərbad oyununa rast gəlinməmişdi. Ötürmələrdə iyirmiyədək səhvə yol verən Almeyda dünənki oyunda daha çox şotlandlara kömək etdi.
Alharbi El Jadeyaoui. Bu, 67 nömrə haqda yazmağa söz tapmaq çətindi. “Uyğunlaşa bilmir”, “hələ ki, öz oyununu tapmayıb” və s. ifadələrin yeri artıq tükənib. Mərakeşli yarımmüdafiəçi “Qarabağ”ın adına və səviyyəsinə uyğun gəlmir. Daha çox turist gəzintisinə çıxan qonağı xatırladan El Jadeyaouinin faydalı iş əmsalının çox aşağı olması, de-fakto, Azərbaycan çempionunu hücumlarını tək – sol cinahdan qurmağa məcbur edir. Onun mövqeyinə Əfran İsmayılov daxil olduqdan sonra sağ cinah dirildi. Təəssüf ki, İsmayılovun fiziki durumu 90 dəqiqə mübarizə aparmağa imkan vermirdi.
Start heyətində hücumda yer alan Raydell Puppon haqda qəti fikir söyləmək tez olsa da, dünənki oyunda rəqib qapısı qarşısında əlahiddə heç nəylə yadda qalmadığını qeyd etməliyik.
Dani Quintana oyunu daim üzərinə götürməyə cəhd göstərsə də, çoxsaylı qüsurları potensialına şübhə etməyə kifayət qədər əsas verir. Hücumların kəsərini artırmaq funksiyasını yerinə yetirməli olan əlaqələndirici halqa, nə sol cinahdan irəliləməli olan Reynaldonu vaxtaşırı topla təmin edirdi, nə də özü ciddi təhlükə yaradırdı.
Fasiləyə qədər oyunu diqtə edən tərəf təmsilçimiz idi. Ancaq real qol vəziyyətlərinə gəlincə, cəmi bir dəfə Kreyq Qordon məharətini nümayiş etdirməli oldu. Riçard Almeydanın yaxın küncə ünvanladığı zərbədən sonra əlcək sahibi inamlı sıçrayışla 30 minlik stadionun “partlaması”nı əngəllədi. Bir dəfə də Rəşad Sadıqov fərqlən bilərdi. Ancaq meydançanın bərbad vəziyyətdə olması, künc zərbəsindən sonra təcrübəli kapitanın topa zərbə endirməsinə imkan vermədi. Qalib gəlmək istəyən komanda üçün ilk 45 dəqiqədə 1,5 qol epizodu yaratmaq əlbəttə ki, azdı.
Fasilədən sonra isə 2-ci zona itdi. Müdafiə və hücum xətti arası ilə əlaqələndirici zəncir yox idi. Bunda əlbəttə ki, Almeydanın “müstəsna xidməti” oldu. Azərbaycan çempionunun fiziki cəhətdən rəqibə uduzması da hər ötən dəqiqə daha qabarıq şəkildə özünü büruzə verirdi. Yeni transferlər Dani Quintana, Alharbi El Jadeyaoui və Raydell Pupponun oyunun gedişində əvəzlənmələri, baş məşqçinin onlardan razı qalmadığını əyani şəkildə göstərdi.
“Qarabağ”ın cari Çempionlar Liqasında doğma “divarlar arası”nda nəinki qələbə qazanması, heç qol vura bilməməsi daha bir həyəcan siqnalıdı. Bu, Ağdam təmsilçisinin müdafiədən oynayan komandaların qapısına yol tapmaqda çətinliklərlə üzləşdiyindən xəbər verir ki, Avropa Liqasının pley-off mərhələsində əks-sədasını hiss etdirə bilər.
“Köhlən atlar”ın ən böyük uğuru kimi qələmə alacağımız məqam isə, komandada özünəinam hissinin artmasıdı. Çempionumuzun istənilən rəqib qarşısında dizlərinin əsməməsi faktdı. Psixoloji cəhətdən çox arxayın oynayan ağdamlılar, 100 minlik stadionlarda belə özlərini rahat hiss edə bilirlər. Əlbəttə, püşkatmadan da çox asılı olacaq. Ancaq ötənilki təcrübənin bu dəfə Qurban Qurbanov və komandasının yardımına çatacağına inam böyükdü.
CEYHUN ƏLİYEV
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”