Müsahibə
Vaqif Heydərli Avropaya yenə futbolçu aparır: “Adlarını açıqlasam…”
FİFA meneceri Vaqif Heydərli “Apasport”a müsahibə …
FİFA meneceri Vaqif Heydərli “Apasport”a müsahibə verib.
Futbolinfo.az həmin müsahibəni təqdim edir:
– “Sportinq”in B komandasında forma geyinən Budaq Nəsirovla, “Slaviya”nın U-19 və U-21 komandalarının üzvü Fərid Nəbiyevin menecerisiz. Bu futbolçuların hazırkı durumu sizi qane edirmi və onların gələcəyini necə görürsüz?
– Budaq milli komandaya gələnə qədər klubunda oynayırdı. Sadəcə, Almaniya ilə matçda zədələndi və ikinci oyuna ağrıkəsici iynə vurduraraq çıxmışdı. Bundan sonra müalicə aldı. Son 4-5 gündü məşqlərə qoşulub, artıq heyətə qayıtmalıdı. Yavaş-yavaş Avropaya uyğunlaşır. 2-3 dəfə kritik vaxtlarda zədə aldı. Keçən il məşqçi dəyişən vaxt zədələndi, 3 ay oynamadı. İndi də mütəmadi oynadığı vaxt millinin heyətində xəsarət aldı. Bir az bəxtsizlik oldu, amma toparlayacağına inanıram. Bu gün oynasa, müntəzəm çıxış etməyə başlayacaq.
Fəridə gəlincə, onda vəziyyət çox yaxşıdı. Bildiyiniz kimi, etimad göstərirlər və bütün matçlarda çıxış edir. Yaşı “Slaviya”nın 19 yaşlılarına da düşsə də, 21 yaşlılarda da oynayır. Karyerası inkişaf edən xətt üzrə gedir. Bu cür davam edəcəyi təqdirdə, qısa zamanda daha uğurlu nəticələr olacaq.
– Kamran Ağayev Portuqaliyadan sonra Çexiyada da çox qalası olmadı. Albaniyada özünü yaxşı tərəfdən göstərən Rauf Əliyev isə “Kukesi”dən ayrılıb və Azərbaycana qayıtmaq istəyir. Sizin futbolçularınızdan ölkəyə dönmək istədiyini deyən varmı? Razılaşın ki, bizim oyunçularda xarakter problemi var…
– Mən Avropaya əsasən gəncləri aparmağa çalışıram. Onların özlərini göstərmək, potensiallarını açmaq üçün qarşılarında daha böyük zamanları olur. Təbii ki, mentalitet olaraq, eyni millətik və hər bir futbolçunun xarakterində problem var. Amma cavanlarla bu barədə profilaktik söhbətlərin çox böyük təsiri olur. Onlarla daim əlaqə saxlayırıq, danışırıq. Bəli, hər bir insan üçün gedib başqa mühit və mentalitetə düşmək, özünü sübut etmək çətindi, əziyyətdi. Biz də müntəzəm olaraq, onlarla söhbət aparırıq, vəziyyəti izah edirik. Deyirik ki, böyük nəticələr qazanmaq, yaxşı, peşəkar futbolçu olmaq istəyirsinizsə, bu əziyyətləri keçməlisiz. Ola bilsin, zaman-zaman çətinliklər yaşanıb. Amma vəziyyət kritik həddə çatmayıb, çalışdığım futbolçular arasında “mən hökmən dönmək istəyirəm” deyən olmayıb.
– Ölkə xaricinə başqa futbolçular da çıxarmaq planınız varmı?
– İşlər gedir. Bu, uzun zaman alan prosesdi, qısa vaxtda əmələ gələn bir şey deyil. Budaqla Fəriddə də belə olub. Bizim futbolçulara Avropada etibar qazandırmaq elə də asan deyil. Oyunçularımız yüksək markalı deyillər ki, onlara bir anın içində təklif gəlsin. Bunun üçün zaman tələb olunur. Amma xaricə çıxarmaq istədiyim futbolçular var.
– Adlarını açıqlaya bilərsiz?
– Xeyr, olmaz. Məndə olsa, açıqlayaram. Amma iş prinsiplərinə görə ad çəkmək düzgün deyil. Çünki həmin futbolçuların klubları ilə müqaviləsi var. Danışıq apardığım oyunçuların adlarını açıqlasam, digər klublar ortaya girə bilər. Prosedur qaydası belədi. Məsələ həll olunmayana qədər ad çəkmək doğru çıxmır. Peşəkar klub danışıq aparıb, heyətinə qatmaq istədiyi futbolçunu müqavilə imzalamazdan öncə açıqlamaz.
– Neçə futbolçunun ölkə xaricinə çıxışı real görünür?
– Hazırda üçünün üzərində çalışıram. Birinin yaşı nisbətən azdı. Amma indidən apara bilsəm, bəlkə də, daha yaxşı səviyyəyə çıxar. Bildiyiniz kimi, Avropada müqavilə imzalamaq üçün futbolçunun yaşı minimum 18 olmalıdı. İkisi yaxın gələcək, biri isə bir qədər gec müddət üçün nəzərdə tutulub. Bu, indiyə olan məlumatdı. Say arta da və ya apardığımız danışıqlardan hansısa alınmaya da bilər. Sırf məndən asılı olmayan səbəblər də var.
– Ölkə xaricinə çıxmaqla bağlı özü sizə müraciət edən futbolçu varmı? Yoxsa ancaq siz bu təşəbbüslə çıxış edirsiz…
– Son vaxtlar belə istəklə müraciət edən futbolçularımız çoxalıb. Amma istəməklə deyil. Mən də Avropada böyük menecer şirkətinin sahibi olmaq, daha yüksək səviyyəli futbolçularla işləmək istəyirəm. Lakin təkcə mənim istəyimlə alınan bir şey deyil. Bunun üçün işləmək lazımdı. Futbolçuların istəməkləri təqdirəlayiq haldı. Əvvəl belə düşünmürdülərsə, indi həvəsləniblər. Təbii ki, onlara dərhal “sən bacarmazsan” cavabını vermirik. İzah edirik ki, xaricə getmək üçün sən olduğun yaş qrupunda əsas heyətdə oynamalı, öndə gedən futbolçu olmalısan. Bu kriteriyalar yoxdusa, həmin futbolçuları xaricə klublara təklif etməyin mənası yoxdu. Müraciət edənlərin içində ən bacarıqlıları seçirik. Bu gün ciddi fikirdə olmadığımız hər hansı futbolçu çempionatın ikinci yarısında üzə çıxa, potensialını göstərə və onun haqda fikrimiz dəyişə bilər. Futbolçu oynamayanda çox şey itirir, oynayanda isə əksinə.
– “Qarabağ”ın Çempionlar Liqasının qrup mərhələsində oynaması azərbaycanlı futbolçuları xarici klublara təklif etmək baxımından sizin işinizi asanlaşdırıbmı?
– Təbii. Mən həmişə deyirəm ki, “Qarabağ”ın, o cümlədən digər klublarımızın beynəlxalq arenada qazandığı hər uğur bizim işimizə dəstəkdi. Bura milli komandalarımızın istənilən uğurlu oyununu da aid edirəm. Biz də həmin matçlara əcnəbi skautları, xarici klubların nümayəndələrini dəvət etməyə çalışırıq. Bunlar bir-birinə zəncirvari bağlı məsələlərdi.
– “Qarabağ”ın hansısa futbolçusu ilə bağlı xarici klublardan sizə müraciət edən, vasitəçiliyinizi istəyən olubmu?
– Adını açıqlamayacam. Amma bir futbolçu ilə bağlı soruşublar. Real müstəvidə deyil, sadəcə, fikrimi öyrəniblər. Mən də futbolçu və insani keyfiyyətləri haqda lazımi məlumatları vermişəm. Lakin məsələ ikinci mərhələyə keçməyib. İkinci mərhələyə keçsə, artıq “Qarabağ”a müraciət olunacaq.
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-24 10:00
Samir Abasov Xaviylə görüşə gedib