Ölkə futbolu
Sərxan Hacıyev: “Qərar yoxdur, sadəcə, klublara belə bir addımın planlaşdırıldığı deyilib”
Dövlət tərəfindən klublara ayrılan maliyyə vəsaitinin xərclənmə istiqamətləri ilə bağlı problem davam edir. AFFA klublara hələ də rəsmi cavab verməyib.
Futbolinfo.az xəbər verir ki, AFFA İcraiyyə Komitəsi qurum vasitəsi ilə klublara ayrılan 3 milyon manatın legionerlərə xərclənməməsi haqda qərar qəbul etməyi düşünürdü. Bu barədə öncədən məlumatlandırılan Klublar Komitəsi İcraiyyə Komitəsinin martın 7-də keçirilən iclasından bir gün öncə yığışaraq bunun qarşısını aldı. Daha doğrusu, İcraiyyə Komitəsinə bəyanat ünvanlayıb qərar verməzdən öncə məsələnin bir daha müzakirə edilməsi istənildi.
Yekunda İcraiyyə Komitəsi qərar qəbul etmədi, amma klublara yekun qərar da bildirilmədi. Klublar Komitəsinin sədri Fariz Nəcəfov bir neçə gün öncə futbolinfo.az saytına açıqlamasında AFFA-dan cavab gözlədiklərini bildirmişdi. Qurum hələ ötən həftə yekun qərarı bildirməli idi. Lakin məsələ indiyədək çözülməyib. Görünür, bu səbəbdən Klublar Komitəsi növbəti həftənin əvvəlində yenidən bir araya gələcək.
Məsələyə AFFA-nın baş katibi Sərxan Hacıyevin də münasibətini öyrəndik: “Sözügedən məsələ ilə bağlı İcraiyyə Komitəsinin konkret qərarı olmayıb. Bu məsələ komitənin iclasında müzakirə olunub və ümumi olaraq tövsiyə irəli sürülüb. Məsələnin mahiyyəti klublarla bölüşülüb və bildirilib ki, bu təklifin həyata keçirilməsi ehtimalı var. Artıq bəlli olduğu kimi, klublardan AFFA rəhbərliyinə bununla bağlı müvafiq bəyanat göndərilib. Bir daha xatırladıram ki, qərar yoxdur, sadəcə, planlaşdırıldığı deyilib. Yeni həftənin ilk günlərində AFFA rəhbərliyinin iştirakı ilə Klublar Komitəsinin növbəti iclası olacaq. Həmin yığıncaqda məsələ bir daha müzakirəyə çıxarılacaq”.
Xatırladaq ki, İcraiyyə Komitəsi dövlət tərəfindən ayrılmış vəsaitlərin gələn mövsümdən klublarda olan əcnəbi (legioner) futbolçulara əmək (xidmət) haqqı qismində istifadə edilməsinə qadağa qoyulmasını planlaşdırır.
AĞA
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”