Van der Sar “Ayaks”dan istefa verdi

Edvin van der Sar “Ayaks”dan ayrılıb. Komandanın Çempionlar Liqasından kənarda qalması, ümumiyyətlə, bu mövsüm uğursuz çıxış etməsi icraçı direktorun postu ilə vidalaşmasına səbəb olub.

Futbolinfo.az xəbər verir ki, 2012-ci ildən Amsterdam klubunda müxtəlif vəzifələr tutan sabiq qapıçı Niderlanddan kənarda işləməyə qərar verib. Lakin onun hara gedəcəyi bəlli deyil. Van der Sar bir müddət istirahət etməyi düşünür: “Klubun rəhbərliyində 10 ildən çox çalışdım. Gözəl günlərimiz də oldu, çətin anlarımız da. “Ayaks”da ikinc dəfə önəmli karyera yaşadım və hər şeyə görə kluba minnətdaram. Bir qədər istirahət etmək, daha sonra fərqli işlər görmək ehtiyacı hiss edirəm”.

İstefasını rəsmən elan edən Edvin 1990-99-cu illərdə “Ayaks” forması geyib. Daha sonra 2 il “Yuventus”, 4 il “Fulhem” forması geyən qapıçı 2005-ci ildə “Mançester Yunayted”ə keçib. Burada 6 əla mövsüm keçirən van der Sar karyerasını bitirəndən bəri “Ayaks”da çalışırdı. Hazırda onun 52 yaşı var.